Yardımlı rayonu, Bozayran kənd sakini Həsənoğlu Tələt Həsənoğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, haqsız yerə müavinəti kəsilib:
“Mən, Həsənoğlu Tələt Həsən oğlu, yazıb sizdən xahiş edirəm ki, problemimi işıqlandırasınız.
26 iyun 1972-ci ildə Yardımlı rayonunun Bozayran kəndində anadan olmuşam. 2000-ci ildə Bakı şəhərində öz həyətimdə elektrikli mişar ilə işləyərkən, ehtiyatsızlıq üzündən sol əlimin barmaqlarını kəsmişəm. Sabunçu rayon 3 nömrəli xəstəxanada müalicə almışam.
Dəfələrlə əlimi müalicə etdirməyimə baxmayaraq, sol əlim iş qabiliyyətini itirib. Bununla əlaqədar olaraq 2024-cü ildən 2018-ci ilədək 2-ci qrup əlilliyə görə müavinət almışam. 2018-ci ildən mənim müavinətim kəsilib.
Bir dəfə Masallı, iki dəfə Bakı Reabilitasiya Mərkəzində komissiyada iştirak etmişəm, buna baxmayaraq mənim müavinətim bərpa olunmayıb”.
Məsələ ilə bağlı Əmək və Əhalinin Sosial Müdafiəsi Nazirliyi ilə əlaqə saxladıq. Qurumdan bildirildi ki, Yardımlı rayon sakini, 1972-ci il təvəllüdlü Həsənoğlu Tələt Həsən oğlunun əlilliyi həm elektron sistem üzərindən, həm də 18.10.2023 və 09.02.2024-cü il tarixlərdə Dövlət Tibbi-Sosial Ekspertiza və Reabilitasiya Agentliyinin həkim-ekspertləri tərəfindən əyani baxış zamanı qiymətləndirilib.
Müayinə zamanı vətəndaşın hazırki diaqnozunun əlillik təyinatına əsas vermədiyi müəyyən edilib.
Bu səbəbdən də Nazirlər Kabinetinin 13 may 2022-ci il tarixli 187 nömrəli qərarı ilə təsdiq edilmiş “Əlilliyin müəyyən olunması meyarlarına uyğun olaraq Diaqnoz əlillik əlaməti təyin etmir” barədə qərar verilib.