13 May 2024-cü il tarixində Dreamland Kompleksində “Cəza Cəkmiş Qadınların Cəmiyyətə Qayıdışı” və Gənclər İnkişaf Naminə İctimai Birliklərinin birgə təşkilatçılığı ilə “Qadın Sahibkarların Milli İnkişaf Strategiyasının Hazırlanması: Heydər Əliyevin Gender Siyasətinin Davamı Kimi” adlı Forum keçirilib.
Forum Azərbaycan Respublikasının Dövlət Himninin səsləndirilməsi ilə başlayıb. Daha sonra şəhid övladlarından ibarət “Zəfər Sədası”xor qrupu çıxış edib.
Forumda bir sıra millət vəkilləri, dövlət və qeyri-hökumət təşkilatlarının nümayəndələri, o cümlədən sahibkar qadınlar iştirak ediblər.
Açılış nitqini “Cəza Cəkmiş Qadınların Cəmiyyətə Qayıdışı” və Gənclər İnkişaf Naminə İctimai Birliklərin sədrləri Firuzə İskəndərova və Rəvan Cəfərli qonaqları salamlayaraq birlikdə gördükləri işlər və gələcək layihələr barədə ətraflı məlumat verib.
“Heydər Əliyev və dövlət qadın siyasəti Müasir dövlət qadın siyasətinin banisi” mövzusundakı I panelin moderatoru “Milli Məclis” jurnalinin baş redaktoru Ülviyyə Abdullayeva, spikerləri isə Milli Məclisin Ailə, Qadın və Uşaq Məsələləri Komitəsinin sədri Hicran Huseynova, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova, millət vəkili Könül Nurullayeva, Unicef Azərbaycan nümayəndəsi Töhfə Cəmilova olub.
Mövzu ilə bağlı Hicran Hüseynova çıxışında son illər qadınlarımızın sahibkarlıqda və digər sahələrdə əldə etdikləri uğurlardan bəhs edərək bunun dövlətin uğurlu siyasətinin nəticəsi olduğunu bildirib. Sədr qeyd edib ki, Dövlət Komitəsi olaraq qadın sahibkarlığının inkişafına daim dəstək verir və Azərbaycan brendinin inkişafında, ölkənin ümumi rifahının yüksəldilməsində qadınlarımızın rolunu artırılması üçün layihələr edilir. O, Forumun bu istiqamətdə uğurların artırılmasına dəstək olacağına inandığını bildirib.
H. Hüseynova sözlərinə görə müasir iqtisadiyyatda qadın sahibkarlığı kiçik və orta sahibkarlığın daha dinamik hissəsini təşkil edir. Statistik məlumatlara görə, dünyada yeni biznes-strukturların 25 faizdən çoxunu qadınlar yaratmışdır. Azərbaycanda da qadınlar ildən-ilə kiçik və orta sahibkarlıqda geniş təmsil olunmağa başlayıblar. Bu isə sosial-iqtisadi inkişafın, o cümlədən, məşğulluğun təmin olunması baxımından mühüm əhəmiyyət kəsb edir.
Forum spikerləri sırasında yer alan Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova bildirdi ki, Azərbaycanda qadınların hüquqlarının qorunması, onların ictimai fəallığının təşkili məsələsi Ulu Öndər Heydər Əliyev tərəfindən daim diqqət mərkəzində saxlanılıb. Və bu gün onun yolu ilə gedərək məsuliyyətini daşıdığı vəzifə öhdəliyini vicdanla həyata keçirməyə çalışır.
Daha sonra millət vəkili Könül Nurullayeva çıxış etdi. Onun sözlərinə görə Azərbaycan qadınının ölkənin siyasi, sosial – iqtisadi və mədəni həyatında rolu gündən günə artır. Azərbaycan qadını bundan sonra da müstəqil respublikamızın tərəqqisinə böyük töhvələr verməkdə davam edəcək.
Forum “Qadınların Sahibkarlıq və İcma İnkişafı” mövzusu ilə II panel davam etdirildi.
II panelin moderatoru “Azərsun Holdinq” şirkətinin marketinq müdiri Nəzrin Əliyeva, spikerləri isə Azərbaycan Sahibkar Qadınlar İctimai Birliyinin İdarə Heyətinin sədri Zemfira Ağayeva, “Azərbaycan Business Women” təşkilatının təsisçisi Tatyana Mikayılova, “UAFA” təşkilatının nümayəndəsi Ülviyyə Mirzəyeva, “Məktəbim” layihəsində çalışan sahibkar qadın Nilufər Hüseynzadə, “Mediabalans” şirkətinin icraçı direktoru Nahid Şərifli olub.
“Azərbaycan Business Women” təşkilatının təsisçisi Tatyana Mikayılova qadınların İcma və sahibkarlıq fəaliyyətində inkişafı üçün yeniliyə, İnnovativ fikirlərə üstünlük verməli olduğunu vurğuladı.
Onun sözlərinə görə müasir qadınlar zamanla ayaqlaşmalı, yeni düşüncələrə sahib olmalıdır. Yalnız bu istiqamət onlara hədəfə çatmaqda kömək edə bilər.
Mövzunu Azərbaycan Sahibkar Qadınlar İctimai Birliyi idarə heyətinin sədri Zemfira Ağayeva davam etdirdi.
Daha sonra “UAFA” təşkilatının nümayəndəsi Ülviyyə Mirzəyeva “Məktəbim” layihəsi 2-6 yaş arasında uşaqların təhsilə qeyri bərabər cəlb olunmasını aradan qaldırmaqla, yanaşı qadınların öz təhsil bizneslərini qurmağına da dəstək olduğunu bildirib.
Ölkəmizin ilk milli uşaq markası olan “Shokki Mokki” brendinin təşkilatşlığı ilə baş tutan “Məktəbim” layihəsində çalışan sahibkar qadın Nilufər Hüseynzadə çıxış edib.
“Məktəbim” vasitəsilə ilə bölgələrdə İcma fəaliyyəti göstərib inklüziv təhsilə dəstək olduqları çətin və faydalı yolu forum iştirakçılarının diqqətinə çatdırdılar.
“Mediabalans” şirkətinin icraçı direktoru Nahid Şərifli isə öz növbəsində isə sosial media resurslarının sahibkarlığın inkişafında önəmli rolunu qeyd edib.
Forumun hər iki panel müzakirələri mövzuya dair əhəmiyyətli fikirlərlə yadda qaldı.
