ABŞ Konqresinin 119-cu çağırış yeni tərkibinə ilk iş günündə Gürcüstanla bağlı iki qanun layihəsi təqdim olunacaq.
AzVision.az Gürcüstanın “Novosti Qruzii” portalına istinadən xəbər verir ki, ABŞ Helsinki Komissiyasının nümayəndələri, Nümayəndələr Palatasının üzvləri demokrat Stiven Koen və respublikaçı Co Vilson keçirdikləri mətbuat konfransında belə deyiblər.
Beləliklə, ikipartiyalı qrup ilk dəfə 2023-cü ildə Konqresə təqdim edilmiş qanun layihəsi olan “MEGOBARI Aktı” na yenidən qeydiyyatdan keçirməyi planlaşdırır. Onun məqsədi “demokratiyaya xələl gətirən” gürcü rəsmilərinə və fərdlərinə qarşı sanksiyalar tətbiq etmək, həmçinin vətəndaş cəmiyyətinə və Gürcüstanın Avro-Atlantik inteqrasiyasına dəstəyi gücləndirməkdir.
Müəlliflərin iddiasına görə, “MEGOBARI Aktı”nın yenilənmiş variantı “Gürcü arzusu”nun bütün məmurlarının və onların yaxın qohumlarının korrupsiya və ya Gürcüstanın suverenliyinə xələl gətirmək cəhdlərinin tam yoxlanılmasını nəzərdə tutur.
Helsinki Komissiyasının üzvləri ikinci qanun layihəsini “Gürcü kabusunun tanınmaması haqqında qanun” adlandırırlar. Təşəbbüsə əsasən, ABŞ 2024-cü il oktyabrın 26-da Gürcüstanda keçirilən parlament seçkilərinin rəsmi nəticələrini tanımamalıdır.
Qeyd edək ki, kollektiv Qərbin Gürcüstanın legitim hakimiyyətinə qarşı qərəzli addımlarına cavab olaraq, rəsmi Tbilisi hökumət əleyhinə mitinqlərdə və iğtişaşlarda iştirak etmiş 25 əcnəbinin ölkədən qovulması barədə qərar verib.