Azərbaycan Dövlət Su Ehtiyatları Agentliyinin Tikilməkdə Olan Obyektlərin Müdiriyyəti Köhnə Xanqızı və P-O kanallarının yenidən qurulması (I mərhələ) üzrə satınalmanın nəticələrini açıqlayıb. Qurum “Muğansutikinti” MMC-ni qalib seçib və tərəflər arasında 22.928.511,76 manat məbləğində satınalma müqaviləsinin imzalanması nəzərdə tutulur.
Qeyd edək ki, Tikilməkdə Olan Obyektlərin Müdiriyyəti Köhnə Xanqızı və P-O kanallarının yenidən qurulması üzrə (I mərhələ) 28.03.2024-cü ildə başladığı satınalmanın nəticələrinə dair dövlət satınalmalarının vahid internet portalında 16.07.2024-cü ildə də bir bildiriş yerləşdirib. Qurum bu müsabiqədə “EVRASCON” ASC -ni qalib seçərək 28.595.565,03 manat məbləğində satınalma müqaviləsinin imzalanmasını nəzərdə tutduğunu elan etmişdi.
Sözügedən bildirişdə Tikilməkdə Olan Obyektlərin Müdiriyyəti təchizatçıların satınalmadan kənarlaşdırılmasının səbəblərini açıqlamışdı. “”MUĞANSUTİKİNTİ” MMC – Satınalma müqaviləsini bağlamaq səlahiyyətinin olması meyarı üzrə reyestr çıxarışı təqdim edilsə də, notarial təsdiqi və nizamnamə təqdim edilməmişdir, Müqavilənin icrası zamanı istifadə olunacaq əmlakından sərbəst və məhdudiyyətsiz istifadə etmək imkanının olması meyarı üzrə mövcud qanunvericiliyə və tender şərtlər toplusuna müvafiq olaraq tələb olunan xüsusi texnikalar (şərtlər toplusu 3-cü bölmə 3.3-cü bənd) üzrə arayışlar təqdim edilməyib. Texniki imkanlarının və maddi-texniki bazasının olması meyarı üzrə xüsusi texnikalar haqqında məlumatlar təqdim edilsə də, tırtıllı kranın mövcud olmadığı eyni zamanda ekskavator və özüboşaldan yük avtomobillərinin yetərsayda olmadığı aşkar edilmişdir. Yuxarıda qeyd edilənləri nəzərə alaraq, Dövlət satınalmaları haqqında Azərbaycan Respublikasının Qanunun 35.1.1-ci maddəsinə əsasən uyğunluq göstəricilərinə cavab vermədiyi müəyyən edilmiş təchizatçı “MUĞANSUTİKİNTİ” MMC-nin kənarlaşdırılması məqsədəuyğun hesab edilir.”
Buradan sual yaranır, bəs necə oldu ki, yuxarıda göstərdiklərimiz səbəblərdən tender prosedurundan kənarlaşdırılan “Muğansutikinti” MMC 3 ay sonra elə kənarlaşdırıldığı tenderin qalibi oldu?
Qeyd edək ki, 16.08.2024-cü ildə “Köhnə Xanqızı və P-O kanallarının yenidən qurulması (I mərhələ)” işlərinin satına alınması məqsədi ilə açıq tender metodu ilə keçirilmiş satınalma proseduru Antiinhisar və İstehlak Bazarına Nəzarət Dövlət Xidmətinin 08.08.2024-cü il tarixli qərarı ilə, DSQ-nin 36.1.1 maddəsi (satınalmada iştirak etmək üçün təklifi və təklifin təminatını təqdim etmiş, tələb olunduğu halda müvafiq lisenziyaya və ya icazəyə malik olan təchizatçıların sayı üçdən az olduqda) əsas götürülməklə ləğv edilmişdir.
Maraqlıdır ki, Antiinhisar Xidmətinin ləğv etdiyi satınalmada, Tikilməkdə Olan Obyektlərin Müdiriyyətin sözügedən tenderlə bağlı verdiyi bildirişdə təchizatşıların sayının 3 dən çox olduğu məlum olur. Belə ki, qurum “EVRASCON” ASC -ni qalib seçib “RAMCO” QSC, “PRO LAND” MMC, “AZNEFTEMAŞ” ASC, “MUĞANSUTİKİNTİ” MMC-nin tenderdən kənarlaşdırılmasını məqsədəuyğun hesab etmişdir.
Bəs 5 şirkətin iştirakı ilə keçirilən satınalma nədən təchizatçıların sayı üçdən az olduqda maddəsi ilə ləğv edilib? Görünür Antiinhisar Xidməti Tikilməkdə Olan Obyektlərin Müdiriyyətin şişirdilmiş qiymətlə keçirdiyi bu tenderdə dövlət vəsaitlərinin mənimsənilməsinin qarşısını bu yolla alıb. Çünki, Köhnə Xanqızı və P-O kanallarının yenidən qurulması (I mərhələ) üzrə ləğv edilmiş tenderdə “EVRASCON” ASC 28.595.565,03 manatla qalib seçilmişdisə, ikinci, “Muğansutikinti” MMC-nin qalib seçildiyi tender 22.928.511,76 manat qiymətləndirilib. Göründüyü kimi ən azı 5 milyon yarım dövlət vəsaitinin mənimsənilməsinin qarşısı alınıb.
Tikilməkdə Olan Obyektlərin Müdiriyyətin keçirdiyi tenderlərin daha maraqlı tərəfləri bundan sonra başlayır.
Qurum “Muğansutikinti” MMC-ni qalib seçdiyi tenderdə isə “Gidromaşservis” QSC ni satınalmadan kənarlaşdırıb. Səbəb isə bunları göstərib: Təchizatçının satınalma müqaviləsinin icrası üçün Peşəkarlıq və Təcrübə meyarının şərtlər toplusu ilə təyin edilmiş tələblərinə cavab vermədiyi müəyyən edilmişdir, belə ki, təchizatçı tərəfindən təqdim edilmiş sənədlərinin təhlili zamanı oxşar analoji xüsusiyyətli işlərin görülməsi təcrübəsinin üzrə şüşə lifli paylayıcı boru çəkilişi təcrübəsi olsa da baş suqəbuledici qurğunun tikintisi üzrə müqavilə və alt sənədləri təqdim olunmamışdır. – Satınalma müqaviləsinin icrası üçün maliyyə imkanı və ödəmə qabiliyyətinin olması meyarı üzrə sənədlərinin təhlili zamanı maliyyə hesabatlarının təlimatlara müvafiq olaraq tərtib olunmaması səbəbi ilə əməliyyat üzrə pul daxil olmalarının müəyyən edilməsi mümkün olmamış eyni zamanda təqdim edilmiş hesabatlara əsasən kreditor və debitor borcların dövretmə qabiliyyəti (günlərlə) maliyyə göstəriciləri üzrə şərtlər toplusu ilə müəyyən edilmiş tələblərə cavab vermədiyi aşkar edilmişdir. – Təchizatçının satınalma müqaviləsinin icrası üçün texniki imkanlarının və maddi-texniki bazasının olması meyarı üzrə nəqliyyat vasitələri və xüsusi texnikalar haqqında məlumatlar təqdim edilsə də, təsdiqedici sənədlərdə (1 ədəd buldozer və 1 ədəd qreyderin qeydiyat şəhadətnamələri Azərtunelsutikintiyə aiddir, niyyət protokolu isə Azərtunel MMC-yə aiddir) uyğunsuzluq aşkar edilmişdir. – Müvafiq tələblərə cavab verən işçi qüvvəsinin olmasına dair işçilərin təcrübəsini təsdiq edən sənədlər (bəzi işçilərin əmək müqaviləsi bildirişlərinə əsasən şərtlər toplusu tələb olunan vəzifələri uyğun gəlmir) əlavə edilməmişdir.
Qeyd edək ki, Tikilməkdə Olan Obyektlərin Müdiriyyəti bu qədər uyğunsuzluq aşkar etdiyi “Gidromaşservis” QSC ilə son iki ildə bir neçə satınalma müqaviləsi bağlayıb, dövlət sifarişi verib.
“Ağcabədi rayonunun Yeni Qaradolaq, Qaradolaq, Avşar və digər kəndlərinin əkin sahələrinin suvarma suyu ilə təminatının yaxşılaşdırılması üzrə 31.150.000 manat məbləğində satınalma müqaviləsinin bağlanıldığı 15.12.2023-cü ildə dərc edilib. Tenderin başlanma tarixi 13.12.2023-cü il bitmə tarixi isə 16.05.2025-ci ilə müəyyən edilib.
İmişli rayonunda Qızılarx kanalının yenidən qurulması (I mərhələ) üzrə 17.817.949,32 manat məbləğində satınalma müqaviləsinin bağlanıldığı 01.12.2022-ci ildə dərc edilib.
“İmişli rayonunun Cəfərli kəndinin əkin sahələrinin su təminatının yaxşılaşdırılması tədbirləri” satın alınması üzrə 880.008,92 manat məbləğində satınalma müqaviləsinin bağlanıldığı 29.11.2022-ci ildə dərc edilib.
Göründüyü kimi 2022-ci ilin dekabrından 2023-cü ilin dekabrına Tikilməkdə Olan Obyektlərin Müdiriyyəti “Gidromaşservis” QSC ilə ümumi dəyəri 49 847 957 manat olan 3 satınalma müqaviləsi bağlayıb. Buradan da ortaya suallar çıxır. Tikilməkdə Olan Obyektlərin Müdiriyyəti bir il əvvəl “Gidromaşservis” QSC ilə 50 milyon manata yaxın müqavilə bağlayanda bu çatışmazlıqları görməyibmi?
Düzdür, bu müqavilər Azərbaycan Meliorasiya və Su Təsərrüfatı” ASC-nin tabeliyində Tikilməkdə olan Meliorasiya və İrriqasiya Obyektlərinin Birləşmiş Müdiriyyəti tərəfindən bağlanılıb. Azərbaycan Dövlət Su Ehtiyatları Agentliyinin Tikilməkdə Olan Obyektlərin Müdiriyyəti də həmin qurumun bazasında yaradıldığından onun varisi hesab etmək olar.
İndi təsəvvür edin. Satınalmalara nəzarətin gücləndirildiyi son aylarda Antiinhisar Xidməti Tikilməkdə Olan Obyektlərin Müdiriyyətin şişirdilmiş qiymətlərlə keçirdiyi tenderin qarşısını alıbsa, “Gidromaşservis” QSC ilə bağlanmış 50 milyon manata qədər hesablanmış satınalmaların qiyməti görəsən nə qədər şişirdilib?
Xatırlatmaq istərdik ki, vaxtı ilə “Meliorasiya və Su Təsərrüfatı” ASC-yə tabeli Tikilməkdə olan Meliorasiya və İrriqasiya Obyektlərinin Birləşmiş Müdiriyyətinin direktoru Ramiz Vəkilov olub. O, bu quruma 20 ildən çox rəhbərlik edib. Onun rəhbərlik etdiyi dövrdə, respublika ərazisində, meliorasiya, iriqasiya və suvarma sistemlərinin fəaliyyətini yaxşılaşdırılması məqsədi ilə son illər yüz milyonlarla manat dövlət vəsaitləri ayrılıb. Lakin qurumun gördüyü işlərin səmərəli olmadığını Prezident İlham Əliyev də 2020-ci ilin iyulun 23-də su təsərrüfatının vəziyyətinə həsr olunmuş videoformatda keçirilən müşavirədə açıqlamışdı.
Hazırda, struktur islahatlrı aparıldıqdan sonra Dövlət Su Ehtiyatları Agentliyinin Tikilməkdə Olan Obyektlərin Müdiriyyətin yeni direktoru Məmmədov Samir Teymur oğludur. O, 2022-ci ilin yanvar ayında Meliorasiya və Su Təsərrüfatı Açıq Səhmdar Cəmiyyətinin tabeliyində yaradılmış “Satınalmaların Təşkili və Müqavilələrin İcrasına Nəzarət” MMC-nin direktoru olub. Dövlət Su Ehtiyatları Agentliyinin sədri Zaur Mikayılovun kadrıdır, ən yaxın adamlarından biri hesab edilir.
Tikilməkdə Olan Obyektlərin Müdiriyyətin 23 milyon manat civarında müqavilə bağlamağı planlaşdırdığı “MUĞAN SU TİKİNTİ” MMC (VÖEN 6800007831) Dövlət Vergi Xidmətinin 5 saylı Ərazi Vergilər İdarəsində 01.03.2000-ci ildə dövlət qeydiyyatına alınıb. Nizamnamə kapitalı 597 230.00 manat olan şirkətin hüquqi ünvanı SABİRABAD RAYONU, QALAĞAYIN,-da yerləşir. MMC-nin qanuni təmsilçisi Talıbov Mirqəfər Mirəziz oğludur.
Qeyd edək ki, MMC-nin əsl sahibi uzun müddət “Azərsutikinti” ASC-nin sədr müavini işləmiş Vaqif Qurbanovdur. “MUĞAN SU TİKİNTİ” MMC vaxtı ilə “Azərsutikinti” ASC-nin törəmə müəssisəsi olub və Vaqif Qurbanovun atası Ağayar Qurbanov uzun müddət bu müəssisəyə rəhbərlik edib. Daha sonra Vaqif Qurbanov müəssisəni özəlləşdirib.
Aktualinfo.org