“Ölkədə duru, eləcə də kərə yağı bazarında ciddi problemlər var. Nehrə yağı kimi “Nənəmin yağı” adı altında satılan məhsulların əksəriyyəti saxtadır, təmiz süddən hazırlanmır”.
Bunu TNS-ə Azad istehlakçılar Birliyinin (AİB) sədri Eyyub Hüseynov deyib.
O, əmtəə bazarında satılan saxta duru yağların olduğunu da bildirib: “Yunanıstdan gətirlən “Vero Greco” 5 litrlik zeytun yağı var. Üzərində zeytun şəkli olan yaşıl qutularda qablaşdırılır və 45 manatdan baha qiymətə satılır. O yağlar saxtadır və biz bu barədə Azərbaycan Qida Təhlükəsizliyi Agentliyinə (AQTA) məlumat vermişik. Məlum olub ki, həmin yağların tərkibində maksimum 5 faiz zeytun yağı var. Məhsul zeytunun “jmıx”ından hazırlanıb, qalanı isə naməlum bitki yağlarıdır. Üzərində olan ştrix-kod müəmmalıdır. Bununla bağlı Yunanıstana – istehsalçıya yazdım. İstehsalçı mənim səhv etdiyimi bildirdi. Sonra araşdırma apardıq və məlum oldu ki, həmin ştrix-kod Yunanıstanda saxta yazılıb. Bu barədə gömrük orqanları və AQTA-nı məlumatlandırmışam”.
AİB sədri bildirib ki, kərə yağı bazarında da problemlər davam edir: “Kərə yağı adı ilə satılan yağların çoxu qarışıq yağlardır. Məsələn,“Tulçinka” yağı qarışıq yağdır, amma əhali onu kərə yağı kimi alır.
Bu qəbildən olan yağların üzərində “təbii yağ” yazılır, inək şəkli çəkilir, amma bunlar inək yağı deyil. AQTA rəhbərliyinə yazmışam ki, bu yağların tərkibi göstərilsin. Sadəcə bitki yağları yazılmasın.
Əmtəə bazarında təmiz yağlar da var”.
AİB sədrinin sözlərinə görə, Yeni Zelandiya yağları daha keyfiyyətlidir: “Yeni Zelandiyada konfransa getmişdim və orada yağların istehsalı ilə tanış olmaq imkanım oldu. Heyvanlar açıq havada otladığı, qış mövsümü olmadığı üçün kərə yağı nisbətən ucuz gəlir. Əslində, kərə yağı 20 manatdan ucuz olmalı deyil”.
AİB sədri bildirib ki, kərə yağları əllə sxdıqda daha bərk olur, kəsəndə əzilir. Marqarin yağları isə səlis kəsilir.