Bu günlərdə Dövlət Gömrük Komitəsinin rəhbəri Şahin Bağırovun “Baku TV”nin “Rəsmi cavab” verilişində söylədikləri ciddi müzakirələrə yol açıb.
Bizimxeber.az bildirir ki, Ş.Bağırov son dövrdə gömrük sahəsində aradan qaldırılan nöqsanlardan, eləcə də vətəndaş şikayətlərindən danışıb. Həmçinin o etiraf edib ki, gömrükdə rüşvətin kökü hələ kəsilməyib və bununla mübarizə aparmaq çətindir.
Bu etiraflar Komitə rəhbəri olaraq onun fəaliyyətini böyük sual altında qoyub.
Müsahibənin detallarına diqqət etdikdə Şahin Bağırovun rəhbəri olduğu sistemdə ciddi nöqsanların hələ də kökm sürdüyü aşkar görünür. Hətta o bunu açıq etiraf da edir. Elə isə, maraqlıdır, nədən islahatçı donu geyindirilmiş Şahin Bağırov bu problemləri kökündən həll edə bilmir. Zatən onun söykədiyi məqamlar ondan əvvəlki rəhbər şəxslərin zamanında da var idi. İndi də bu problemlər davam edirsə, o zaman dəyişən nədir?
Uzun illərdir gömrükdə hökm sürən qanunsuz şirkətlər və onların fəaliyyəti barədə mütəmadi məlumatlar gündəmi şilkələyir. Qanuni fəaliyyət göstərən sahibkarlar belə qanunsuz şirkətlərin fəaliyyətindən narazılıqlarını bildirirlər. Üstəlik, belə şirkətlərin fəaliyyəti aidiyyatı qurumların diqqətindən bilərəkdən kənarda saxlanılır.
İdxal-İxrac Əməliyyatları üzrə Nəzarət Baş İdarəsinin rəhbəri Azər Məmmədov bu şirkətlərin fəaliyyətini bloklamalı olduğu halda bunu etmir. Əksinə, bəzi məlumatlara görə, gömrükdə fəaliyyət göstərən qanunsuz şirkətlər onun dəstəyini alır və ya onun nəzarətindədir. Qəribə burasındadır ki, Azər Məmmədov bu iddiaların heç birinə cavab vermir və susmağa üstünlük verir.
Məhz bu konteksdə Şahin Bağırovun söylədiklərindən belə bir nəticəyə gəlmək olur ki,Gömrük sistemində baş verənlər, korrupsiya halları və sairə idarə olunur və ortada ciddi pul qazanmaları hələ də qalır. Hansı ki, bu hallar köhnə rəhbərlərin dönəmində də var idi.
Ümumilikdə, Şahin Bağırovun məlum müsahibəsi onun gələcək fəaliyyətini böyük sual altında qoyur. Bu hal göstərir ki, ya Şahin Bağırov atrıq işləmək istəmir, ya da yuxarı qurumlara “Gömrükdə korrupsiya halları var və biz bunun qarşısını ala bilmirik” mesajını verir.
İstənilən halda Şahin Bağırovun etirafı dövlətin əsas qazanc strukruru olan qurumdakı vəziyyətin ciddi olduğunu göstərir.