Fransa Prezidenti Makron öz hərəkətlərilə Ukraynadakı müharibənin daha da qızışmasına çalışır. Belə ki, bir müddət əvvəl Ukraynaya Fransa hərbçilərini göndərən Makron indi də Rusiya ərazisini vurmaq üçün uzaqmənzilli raketləri Kiyevə vermək istəyir. O, Parisin Kiyevə uzaqmənzilli raketlər vermək qərarına gəldiyini bildirib.
RFI radiostansiyasının məlumatına görə, Fransa artıq Ukraynaya utilizasiya vaxtı çatan uzaqmənzilli “SCALP” raketlərini təhvil verib.
Fransa Ukraynaya göndərmək üçün yeni hərbi partiyası hazırlayır.
“Reuters”in məlumatına görə isə Fransanın müdafiə nazir Sebastyan Lekornu parlament dinləmələrində Ukraynaya göndərmək üçün yeni hərbi yardım partiyası hazırladıqlarını açıqlayıb.
O, bildirib ki, yeni hərbi yardım paketində Ukraynaya daha öncə tədarük edilmiş “SAMP/T” sistemləri üçün “Aster 30” yer-hava raketləri olacaq.
Görünən odur ki, hərbçilərini Ukraynaya göndərən Fransa indi də Rusiya ərazisini vurmaq üçün uzaqmənzilli raketləri Kiyevə vermək istəyir.
Görəsən, bu canfəşanlıqla Makron nə istəyir?
Mövzu ilə bağlı Bizim.Media-ya açıqlamasında Milli Məclisin deputatı Hikmət Babaoğlu bildirir ki, natamamlıq kompleksi Makronu belə aqressiv davranışlara sövq edir:
“Makron Fransası Avropa siyasi dəyərlərini və beynəlxalq hüququn bütün qırmızı cizgilərini keçir. Diqqət etsək, görəcəyik ki, Makronun aqressivliyi təkcə Azərbaycana, Cənubi Qafqaza qarşı deyil, bütövlükdə həm də Avropanın özünə qarşıdır.
İki gün bundan öncə Almaniyada səfərdə olan Makron bildirib ki, Avropa heç zaman indiki qədər fərdiyyətçi olmayıb. Bunu deyən zaman görünür, Makron Avropanın ayrı-ayrı müstəqil dövlətlərinin öz hüquqlarını Parisin lehinə məhdudlaşdırılmasını nəzərdə tutur. Belə davranış Avropanın özündə Makrona qarşı bir fikir formalaşdırır.
Avropa Birliyi hər nə qədər müstəqil dövlətlərdən ibarətdirsə və onlar öz müstəqil hüquqlarının bir hissəsini ümumavropa maraqlarına güzəştə gedirlərsə də, bir o qədər də müstəqil dövlətlərdir. Sadəcə, bu güzəştlər ümumi mənafelər naminə edilir. Makron isə düşünür ki, bütün bu güzəştlər Fransa naminə edilməlidir. Yəni Avropanın bütün ölkələri Makron kimi düşmən adlandırsa, onlar da həmin ölkəyə düşmən, kimi dost adlandırsa, ona qarşı da dost olmalıdırlar.
Bu tamamilə absurddur.
Makronun belə davranışı ondakı natamamlıq kompleksindən irəli gəlir. Şəxsiyyət özünə, yürütdüyü siyasətin ədalətli və beynəlxalq hüquqa əsaslandığına əmin olan zaman, bu cür fikirlər səsləndirməz. Ona görə də Makronun bir siyasətçi kimi natamam siyasətçi olduğuna get-gedə daha çox inanıram. Özü də bunun fərqindədir. Məhz natamamlıq kompleksi Makronun bu cür aqressiv davranışlarına gətirib çıxarır.
İndi də o, Rusiyanı hədəf alıb. Məsələ ondadır ki, onun ən yüksək tribunalardan səsləndirdiyi fikirlərin heç biri həyata keçmədiyindən artıq qeyri-ciddi qəbul olunur. Ona görə Makron ya natamamlıq kompleksindən xilas olmalıdır, ya da o, Fransanın nüfuzunu beynəlxalq münasibətlər sistemində daha da gözdən salmaqda davam edəcək”.
Bizim.Media