Əməkdar artist, ixtiraçı alim Qorxmaz Əlilicanzadə Azərbaycanın Dövlət bayrağında ayla ulduzun yerinin dəyişməsini, digər türk dövlətlərində olduğu kimi, Azərbaycan bayrağında da batan ayın doğan ayla əvəz edilməsi təklifini irəli sürüb. Q.Əlilicanzadə məsələnin Milli Məclisdə qaldırılmasını da təklif edib.
Bu barədə Pravda.az-a fikirlərini bölüşən Milli Məclisin deputatı Tahir Kərimli də bildirib ki, həqiqətən də, Azərbaycan Xalq Cümhuriyyətinin dövründə bayrağımızda doğan ay rəmzi olub.
“Ümumiyyətlə, batan ay tənəzzülün rəmzi hesab olunur. Bayrağımız qəbul olunanda da bu söhbətlər gedirdi. Amma bu məsələyə müdaxilə etməyim çətindir. Himnlə bağlı çıxışımı xatırlayırsınız. Konstitusiyanın qəbul edilməsindən keçən 23 il ərzində ilk dəfə himnlə bağlı Konstitusiya qanunu qəbul olunan zaman himn haqqında Azərbaycan Milli Elmlər Akademiyasının 3 mart 2000-ci il tarixli qərarına əsaslandım ki, dövlət himninin müəllifi başqasıdır. Eyni zamanda Üzeyir Hacıbəyov Yusif Vəzir Çəmənzəminliyə göndərdiyi məktubda izah etmişdi ki, himn qəmgindir, mən musiqini daha nikbin etmək istəyirəm, ona görə hələ müsabiqəyə təqdim etmirəm. Digər məsələlərə də istinad edərək himn haqqında müəyyən fikirlər irəli sürmüşdüm ki, himnimiz daha şaqraq, nikbin, Üzeyir bəyin öz istədiyi kimi olsun. Amma az qala yüz minə yaxın insan mənə sosial şəbəkələrdə ağır təhqirlər yağdırdı. Halbuki mənim günahım nə idi? Himn məsələsində başım o qədər çəkdi ki, bayraq məsələsini qaldırmaq mənim sonumu gətirər. Bunu gizlətmirəm. Milli Məclisdə bu məsələni qaldırsam, deputatlıqdan söhbət getmir, bu, insan, şəxsiyyət kimi sonumu gətirər…”, – deputat bildirib.