24 noyabr 2022-ci il tarixində ən uca məqam olan Şəhidlik zirvəsinə ucaldıqdan sonra sonsuz kədər hissiylə, ürək yanğısı ilə Şuşa Fatehi, Şəhid XTQ zabiti Asəf Abid oğlu Ağayevin cənnətdəki doğum günü yüksək təmtətaqla qeyd olundu.
Şuşa Fatehi,Azərbaycanımızın fəxri,igidimiz,qəhrəmanımız, baş tacımız Ağayev Asəf Abid oğlunun 29 yaşı tamam oldu.Şəhidimizin doğum günündə Qax Rayon İcra Hakimiyyətinin Başçısı Musa Şəkiliyev,İcra Hakimiyyətində humanitar və siyasi şöbənin müdiri Vəfa Heydərova,İcra Hakimiyyətində Şəhid Ailələri ilə işləyən şöbənin müdiri Malik Həmzəyev,Yeni Azərbaycan Partiyası Qax Rayon üzrə sədri Natiq Hamısıahverdiyev,”Dünya Ana və Uşaqlar” ictimai Birliyinin sədri Dünyaxanım Əliyeva,birliyin sədr müavini Səriyyə Vəlizadə,”Dünya Ana və Uşaqlar” İctimai Birliyinin Zaqatala təşkilatının sədri Xanım Nurullayeva,1-ci Qarabağ müharibəsi şəhid Murtuzəliyev Zəfərin anası Əzizə xanım,dunyaxeber.orq saytının zaqatala rayonu üzrə rəhbəri Fərid Sulxayev, Qax rayon məktəblərinin müəllim və şagird kollektivləri,Qax rayon ictimaiyyəti,Şuşa Fatehi Asəf Ağayevin döyüş dostları istirak edirdilər.
Azərbaycan Silahlı Qüvvələrinin Baş leytenantı, XTQ zabiti Asəf Abid oğlu Ağayev 24 noyabr 1993-cü ildə Qax şəhərində anadan olub.İgid şəhidimiz Şuşa uğrunda gedən döyüşlərdə böyük qəhrəmanlıq göstərib.Şuşa Fatehi Asəf Abid oğlu Ağayev 17 dekabr 2020-ci ildə Xocavənd istiqamətində minaya düşərək ən uca məqam olan Şəhidlik zirvəsinə ucalıb.
Şuşa Fatehi Asəf Abid oğlu Ağayev 30 il ərzində düşmən tapdağı altında inləyən,əzəli və əbədi yurd yerimiz olan Qarabağın hər bir bölgəsində,xüsusilə qədim Şuşada çəkildiyi videoları ilə, 44 günlük Vətən Müharibəsində göstərdiyi qəhrəmanlıqları ilə tanındı,adı hər bir azərbaycanlının dilində əzbər oldu.O, hər kəsin yaddaşına gülərüzü, xoş zarafatları, şux duruşu,mətin yerişi, şirin ləhcəsi ilə tez-tez səsləndirdiyi “Yaşasın Azərbaycan”,”Yaşasın Spesnaz” kəlmələri ilə əbədi həkk olundu.
Şuşanı gətirdin Qaxa özünlə,
Mətin duruşunla, şirin sözünlə,
Bilin, fəxr eyləyir Vətən sizinlə,
Ölməzlik qazandın İgid Asəfim,
Ey mənim qəhrəman, igid Asəfim.
Şuşa Fatehi Asəf Abid oğlu Ağayev Şəhidlik zirvəsinə ucalmaqdan əvvəl və sonra dövlətimiz tərəfindən hərbi təltiflərə layiq görülüb.
1.”Azərbaycan Ordusunun 100 illiyi” yubiley medalı,
2.”Cəbrayılın azad olunmasına görə” medalı,
3.”Şuşanın azad olunmasına görə” medalı,
4.”Xocavəndin azad olunmasına görə” medalı,
5.”Hərbi xidmətdə fərqləndiyinə görə 3-cü dərəcəli medal” ilə,
6.”Füzulinin azad olunmasına görə” medalı,
7.”Vətən uğrunda” medalı ilə və
8.”Azərbaycan Bayrağı” ordeni ilə.
Məkanı cənnət olsun,nur üzlü Şəhidimizin.
Bütün Şəhidlərimizin məkanları cənnət olsun.
Şəhidlər ölməz,Vətən bölünməz!
Dərin ehtiramla,
Şairə Solmaz Elqızı,
“Dünya Ana və Uşaqlar” İctimai Birliyinin Qax Təşkilatının Sədri.
