Daha bir para-taekvondoçumuz Tokio Paralimpiya Oyunlarında iştirak üçün lisenziya qazandı – YENİLƏNİB

Azərbaycan Milli Paralimpiya Komitəsinin para-taekvando idman növü üzrə milli komandasının üzvü İmaməddin Xəlilov (61 kq) Bolqarıstanın paytaxtı Sofiya şəhərində keçirilən Avropa Təsnifat turnirinin finalında israilli rəqibini məğlub edərək qızıl medal qazanıb.

Bu barədə Milli Paralimpiya Komitəsindən bildirilib.

Bununla da İmaməddin Xəlilov Tokio-2020 XVI Yay Paralimpiya Oyunlarına birbaşa lisenziya qazanıb.

Beləliklə, Milli Paralimpiya Komitəsinin idmançıları 5 idman növündə artıq 13 lisenziya qazanıblar (atletika – 3, üzgüçülük – 3, güllə atıcılığı – 2, pauerliftinq – 1, taekvando – 4)

Azərbaycan para-taekvandoçuları turnirdə uğurlu nəticə göstərərək Tokio-2020 Yay Paralimpiya Oyunlarında iştiraklarını təmin ediblər.

Qeyd edək ki, para-taekvando idman növü ilk dəfə olaraq Paralimpiya Oyunlarının proqramına salınıb.

19:50

Üç para-taekvondoçumuz Tokio 2020 Yay Paralimpiya Oyunlarında iştirak üçün lisenziya qazanıb.

Bu barədə Azərbaycan Respublikası Milli Paralimpiya Komitəsi məlumat yayıb.

Bildirilib ki, para-taekvondo idman növü üzrə milli komandamızın üzvü Aynur Məmmədova (58 kq), Röyalə Fətəliyeva (49 kq) və Əbülfəz Abuzərli (75 kq) Bolqarıstanın paytaxtı Sofiya şəhərində keçirilən Avropa Təsnifat turniririn finalında rəqiblərini məğlub edərək Tokio 2020 XVI Yay Paralimpiya Oyunlarına birbaşa lisenziya qazanıblar.

Bununla Milli Paralimpiya Komitəsinin idmançıları 5 idman növündə artıq 12 lisenziya qazanıblar (atletika – 3, üzgüçülük – 3, güllə atıcılığı – 2, pauerliftinq – 1, taekvondo – 3).

Qeyd edək ki, para-taekvondo idman növü ilk dəfə olaraq Paralimpiya Oyunlarının proqramına salınıb.