Sabirabad rayonunun Qaragüney kənd sakini, eyni zamanda ikinci Qarabağ savaşının iştirakçısı Sübhan Cəfərov “DogruXeber.az” redaksiyasına müraciət edib.
Sübhan Cəfərov bildirir ki, iş üçün “Şirvan şəhər Mərkəzi Xəstəxanası” Publik Hüquqi Şəxsinin direktoru Kamil Əhmədova müraciət edib. Dediyinə görə mühafizəçi, yaxud sürücü işi üçün müraciət etdiyində direktor Kamil Əhmədov ona “iş yoxdur” cavabını verib. Lakin, Subhanın müraciətindən sonra sözügedən xəstəxanaya bir neçə nəfər onun çalışmaq istədiyi vakansiyalar üzrə işə qəbul edilib.
İşə alınan şəxsləri şəxsən tanıyan Sübhan Cəfərov iddia edir ki, işə alınan şəxslərin hər biri müəyyən məbləğ qarşılığında işlə təmin ediliblər. Hətta, işə alınanlar arasında ötən yayımlarımızda ‘ölülərin adına sağlamlıq haqqında arayış verilməsi” mövzusunda adını çəkdiyimiz – sözügedən xəstəxanada şöbə müdiri olan Səadət Quliyevanın əmisi oğlu da var ki, Sübhan Cəfərov onun da rüşvət müqabilində işlə təmin olunduğunu bildirir.
DİQQƏT ! – Bu səhiyyə oçağında ÖLÜLƏR ÜÇÜN DƏ SAĞLAMLIQ HAQQINDA ARAYIŞ SATILIR // VİDEOFAKT
Bəli… 44 gün vətən uğrunda düşmənlə üz-üzə ölümünə çarpışan, şücaətlərinə görə ölkə başçısı tərəfindən medallarla təltif olunan Sübhan Cəfərov hazırda işsizdir və özünün də dediyi kimi ailəsi, valideynləri də onun himayəsindədir.
Halbuki, ölkə başçısının xüsusi tapşırığı var ki, birinci növbədə müharibə iştirakçıları işlə təmin olunmalıdır. O zaman belə çıxır ki, Şirvan Şəhər Mərkəzi Xəstəxanası da daxil olmaqla, əksər dövlət müəssisələri prezidentin tapşırıqlarına məhəl qoymurlar.
Hər halda işsizlikdən gileylənən, intihara cəhd edən, Vətəndaşlıqdan imtina etmək istəyən işsizlərin sayının hər gün daha da artması belə düşünməyə əsas verir…